"Mae'r lle'n wych. Fedrai ddim gweld sut gall y lle fod yn well, i fod yn onest. Ryn ni wedi gweld ein seddi ac maen nhw'n ffantastig. Mae pob agwedd yn ddymunol iawn," meddai John Williams o Bentyrch.

"Ryn ni'n dod i wylio'r gemau i gyd gan fod tocynnau tymor gyda ni, ond wrth edrych ymlaen i'r tymor newydd, y gemau mawr Heineken yn erbyn Toulouse, Harlequins a Sale sy'n tanio'r dychymyg."

"Gobeithio fedrwn chwarae'n dda trwy gydol y tymor, yn enwedig yn y Cwpan
Eingl-Gymreig, gan mai ni yw'r deiliaid presennol."

Mab John yw Hywel, sydd bellach yn byw ym Mhenarth gyda'i deulu ifanc. Yn gefnogwr rygbi Caerdydd ers ei blentyndod, mae e erbyn hyn yn mynd i wylio'r gemau gyda'i fab ei hun, Jac.

"Rwy' wedi bod yn gefnogwr brwd trwy gydol fy oes - yn dilyn Clwb Rygbi Caerdydd yn wreiddiol a nawr y Gleision. Rwy'n cofio fy nhad yn mynd â fi i wylio'r mawrion fel Gareth Edwards yn chwarae. Gemau yn erbyn y Barbariaid rwy'n eu cofio fwyaf."

"Ers i fi briodi a chael plant, mae'n anodd ffeindio'r amser i fynd i bob gêm, ond gan fod Jac nawr yn ddigon hen i fynd i'r gemau, ryn ni wedi bod lawr i wylio'r Gleision yn gyson."

"Mae gyda ni docynnau tymor ar gyfer y tymor newydd ac mae'n noson wych o hwyl i deuluoedd. Mae 'na awyrgylch gret yn y gemau. Mae'r plant yn mwynhau ac yn cymdeithasu gyda'u ffrindiau a theuluoedd eraill."

"Mae'r stadiwm yn edrych yn ffantastig ac mae'r cae chwarae'n edrych yn wych. Mae'r cyfleusterau heb eu ail."

Mae Jac Williams, sy'n 10 oed, hefyd yn gefnogwr brwd.

"Maer stadiwm yn edrych yn fach o'r tu fas ond mae'n anferth tu fewn."

"Mae'n lle gret i fynd o amgylch ac yn edrych yn newydd sbon. Mae'r seddi'n gyfforddus a'r golygfeydd yn wych."

"Rwy'n hoff o ddod lawr 'da Dad i wylio'r chwaraewyr ac hefyd i gwrdd â sawl ffrind ysgol yma."